لاتذكرني فانا ماني بناسي

هديتي قصيدة جديدة إلى قبيلة الهوامل عامه وآل دمخ خاصة
وخاصة الصديق الوفي سعران بن دمخ

لا تذكرنـي فانـا مانـي بنـاسـي = لا تذكـر شايـب مـا لان عـوده
مير ذكرنـي زمـان مـر قاسـي =سن نبله يحسب أني مـن صيـوده
قام يسقيني مـرار الوقـت كاسـي = جلّعنّـي مـن ثيـاب العـز نـوده
ما كسر باسه مع الشـدات باسـي= مير زودنـي علـى نـاره بـروده
وما جبر كسره يكون أفعال ناسـي = مثل ناصر جعل يبطي في وجـوده
يوم جاني من صدوف الضيم ماسي= بانوا الاصحـاب كـل بـان فـوده
يوم عيني حرمـت طعـم النعاسـي = والليالـي المظلمـة جتنـي تـزوده
كل ضيم فيـه يـا ناصـر مآسـي= خص جرح الخاطـر الله لايعـوده
بانـت الفضـه وبينـت النحاسـي = وكل سيف بان حـده فـي جـروده
يوم بعض الناس حل به إعتماسـي =كن في عنقـه مـن الصـدات دوده
يحسب ان الطيب جات به الكراسي = ويحسب ان المال يغني عن عضوده
> ما درى إن المال للطيب مداسـي= والردي مـازاد قـدره مـن نقـوده
البخيل يقول أنـا الطاعـم وكاسـي = منتـه تسبـق فعولـه فـي وروده
حطم الشرهـات بالرقـم القياسـي =ليت يوم ان صد طول في صـدوده
خلني اعيش الحيـاة بـلا مساسـي = قسمه اللي جاه والنفـس محـدوده
ومايشوك الكبد بالهرجـات خاسـي =شاك من شوك القفيـا فـي كبـوده
والمعاريف اعلنت حكـم الفلاسـي = يوم بنك الهينـه قـد خـاب كـوده
والمراجـل ماتجـي بالاختلاسـي =ماتجي الا بيد مـن يثبـت صعـوده
المراجل ماهي بضـرب التباسـي = ماتجي الا بيد مـن وفـى عهـوده
والله انه في السمـا مـادام راسـي =ما حنيـه الا لربـه فـي سجـوده
ما لبست من البشـوت الا مقاسـي = كـم غـلام جاهـل عـدا حـدوده
ليت يعطى دورة الفـرد الاساسـي= لين ياخـذ خاتـم الايـزو وجـوده
من يدور يدور في اضلاع الخماسي = والمثلـث بالـزوايـا بـر...مـوده
نحمد الله يوم ساس الطيب ساسـي= كل قصر قو ساسـه مـن حيـوده
من يدوس الراي من قبـل يداسـي = كثر حسـاده وكثـر مـن شهـوده
ومن ضفر رايه تحت حمر المراسي =تنقضـه لمـا حكـى بـاول بنـوده
وان حكى تعطيه حـق الالتماسـي =والنتيجـه والله إنــك لاتـعـوده
وان حضر في ماقف هرجه تواسي = ينتظر فكـره مـن الداخـل تقـوده
ياحذاري من نسب راعي العساسـي = دور اللي من العرب كـل يـروده
لا تخيـل الا عسيفـات الفراسـي = حرة يفخـر ولدهـا فـي جـدوده
لاطرش كفـو يريـس ولا يراسـي= يقضي اللازم ولا يخلـف وعـوده
من يريد النفل في الأرض العباسـي = مثل من يجني من الحنظـل وروده
المطر لا طاح في الارض اليباسـي =عقب قفـرات الخـلا كـل يـروده
والجنا وان طاب طعمه بالغراسـي = فالرياح العاتيـة مـا هـي تكـوده
ما يزيـد مـن الحـلاة الا دباسـي= كيف راعي البن لامن شـاف ذوده
لاحمـس بنـه وزوده احتمـاسـي= وسط وادي تـو مـا جفـت وروده
والفتى يرسي كما ترسي الرواسـي = ما يعز الراسـي الا مـن جمـوده
يا يابو نايف جرها بصوت العفاسي = صوته اللي يبري العيـن الحسـوده
وانشدوها بليـل رويـال واماسـي = وابن معجـب ودنـا نسمـع ردوده
لان شعره مثل غيـث مـا يقاسـي = لابكر بانـت بروقـه فـي رعـوده
لا دقل سيله تضيق ابـه الحباسـي= من بكـار هايجـه غطـت نجـوده
قالها من صاغها في عقـد ماسـي= صاغها مشبب وصـدر مـن وروده
قالها مـن غيـر قـوس واقتباسـي = صادها من صافي الفكـر وشـروده
وان بدا في الرأي شـك والتباسـي = فالنصيحه في المعاريـف محمـوده



الشاعر/
مشبب بن مهياع

هذه آخر قصائدي اهداء للهوامل كافة
وللاخ سعران بن دمخ خاصة
تقبلوا تحياتي اخوكم / الشاعر مشبب بن مهياع

الله عليك يا اخ مشبب قصيده رائعه وجزله صح لسانك ويستاهل الاخ سعران بن دمخ ويستاهلون الهوامل